UC Eskrima Club misakiyo sa korona

Ni Gabby G. Malagar Updated May 12, 2009 12:00 AM
http://www.philstar.com/Article.aspx?articleid=466583

CEBU, Philippines – Gipakuratan sa University of Cebu (UC) Eskrima Club ang ilang mga kaatbang dihang mihakot kini og 33 medalya -- 13 ka golds, 11 ka silvers ug siyam ka bronzes aron pagsakmit sa overall championship sa Cacoy Doce Pares World Eskrima-Arnis Championship ning bag-o diha sa City Sports Club-Cebu.

Lakip sa gipukan sa UC eskrimadors mao ang mga pambato ni Supreme Grand Master Ciriaco ‘Cacoy’ Cañete, kinsa maoy nahimutang sa ikaduhang dapit sa ilang 10 ka golds, pito ka silvers ug walo ka bronzes.

Ang ikatulong puwesto nakuha sa International Combative Martial Arts Academy (ICMAA) sa Australia nga gipangulohan ni Grand Master Vince Palumbo nga mihakot og walo ka golds, walo ka silvers ug unom ka bronzes.

Si Maximo Caballes Jr. mihatag og duha ka gold sa UC sa boys 12-under openweight category.

Lain pang gold medalists sa UC mao sila si Reil Taba sa 18-28 years old lightweight, John Pepito sa 18-29 middleweight, Paul Joshua Rosas sa 18-28 super middleweight, Emilio Cuevas sa 23-33 heavyweight, Noelyn Bargamento, Savones Abelgas, Christine Faith Velasquez ug June Babe Caballes sa girls 13-17 bracket, Mary Niña Romales alang sa girls 18-33 lightweight division ug ang UC Demonstration Team.

Mihakot og bulawan alang sa Noy Cacoy Doce Pares mao sila si Dean Michael Cañete sa iyang duha ka golds, Robert Sabello, Christian Bag-id, Michael Escario, Danny Serundo ug Andrea Wheatley ug Leah Sedriosa nga adunay tagurha ka golds sa women’s 13-18 middleweight ug heavyweight divisions.

Sa laing bahin, si Palumbo mikabkab og tulo ka bulawan alang sa iyang ICMAA team, samtang ang iyang mga tinun-an nga midaog og bulawan naglakip nilang John Moore, kinsa mihakot sab og tulo ka bulawang medalya, Con Pappas ug si Robert Angus.

Ang ICMAA-Indonesia nga gipangulohan ni Glenn Gardiner nahimutang sa ikaupat sa ilang unom ka golds, 10 ka silvers ug walo ka bronzes, samtang ang Filmocan-Cebu mikapyot sa ikalima sa ilang tulo ka golds, upat ka silvers ug duha ka bronzes.

Ang Reflex Centre-Australia mitapos sa ikaunom nga adunay duha ka golds, upat ka silvers ug upat ka bronzes, gisundan sa Cacoy Doce Pares-Spain sa ilang duha ka golds ug usa ka silver.

Ang PNP Team mikabkab og duha ka golds ug usa ka silver, ang Alarca adunay duha ka golds ug unom ka bronzes, ang Warmer Heart Karate Club-USA midaog og usa ka gold ug usa sab ka silver, ang Cacoy Doce Pares-East Coast adunay usa ka gold ug usa sab ka bronze, ang Filmocan-Iloilo mikabkab og usa ka gold, ang Doce Pares- New Zealand midaog og duha ka silvers, ang Millenium School of Martial Arts-Poland ni Christopher Nasilowski midaog og usa ka silver ug duha ka bronzes ug ang Nasilowski’s Australian team mitiltil og duha ka bronzes. – BANAT NEWS